Tankar ved eit tastatur

I går og i dag har eg kosa meg med litt saum att. Har sydd denne veska tilei tenåringsjente med bursdag i desse dagar.

Veska har ei lomme på innsida, og berereima er teke frå ei anna veske som har vorte kasta tidlegare.

Pynta veska med ein filtblomst frå Panduro. Eg syntest veska vart fin med litt farge, men dersom mottakaren ikkje er samd, kan ho berre knyta opp tråden, så er pynten borte.

Eg måtte berre ha meg ei stor veske, og då eg ikkje fann den eg skulle ha på Verdalsmartna’n, så tok eg sak(s)a i eiga hand og sydde:

Veska er som sagt stor, og ho rommer det meste, både lesestoff og strikketøy. I tillegg har ho regulerbar reim, så eg kan bera ho på skrå over brystet viss eg vil. Reimene vart gjort regulerbare ved hjelp av knapphol:

Og slik ser ho ut i bruk:

Eg fekk pengar i bursdagsgåve frå både pappa og Synnøve og Oddvar, og alle meinte eg kunne kjøpa noko til meg sjølv. Resultatet vart at eg nesten ikkje vågar bruka pengane, for eg veit ikkje heilt sikkert kva eg vil ha. Men iallfall, litt pengar brukte eg på jysk her om dagen til stoff, og stoffet vart i dag nytta i dette vendbare bærenettet med lomme:

Framleis er eg ikkje heilt trygg på korleis eg skal gjere alt, men eg fekk òg gåvehjelp på det punktet, for frå Ellen, Lasse og ungane fekk eg ei bok om korleis ein kan sy vesker sjølv.

Hanken er kanhenda litt kort, får sjå om eg skal laga lenger hank viss eg skal laga fleire.

I helga har postmannen sanneleg vore innom med anna enn rekningar att!

Denne boka er fantastisk! Flotte bilete, forståelege oppskrifter, masse tips og i tillegg mønsterark med 47 modellar. Kvar eg fann denne skatten sa du? Nok ein gong hjå Capris!

Formen er betre i dag. Som trøyst fekk eg desse av Mannen og ungane her om dagen:

… og då må eg jo innrømma at det meste kjennast betre!

I dag er formen faktisk såpass bra at eg har støvsuga golva, baka brød og i tillegg sydd litt. Min fyrste firkantpose etter oppskrift frå Liv-Toril!

Posen er fylt med te-posar og skal stå på kjøkkenbordet. Den er sydd av to dongeribukselår og ei gamal gardin. (Buksa var ikkje i bruk lenger altså, så det er ingen som har vorte bukselause sjølv om eg fekk sydilla!)

Det er aldri for seint å læra seg noko nytt, tenkte eg, og sette meg til ved mamma si gamle symaskin. Og sanneleg, etter mykje prøving og feiling, greide eg å laga noko som liknar ei veske:

I pur glede måtte eg jo berre nytta det bandet eg fann mellom mamma sine gamle stoffrestar til skulderreim, og tru meg; då veska vart ferdig, kjente eg meg verkeleg som “No 1″!

Framleis har eg mykje å læra og masse prøving og feiling, men eg gjer nettopp det då. Prøver og feiler, syr og spretter opp att …

I dag prøvde eg meg på ein liten pung med glidelås:

Ikkje så verst, synast eg sjølv. Problemet er berre at eg slett ikkje kan sy. Dvs eg kan ingen teknikkar, eg veit ikkje korleis det skal gjerast. Og eg angrar fælt på at eg ikkje ville (eller hadde interesse av å) lære meg dette då eg enno hadde mamma til å hjelpa meg … Samstundes ser eg jo at det er mogleg å finna ut av ein del på eiga hand, og så lenge er er positivt innstilt, vil det vere mogleg å greie det meste!

(Forresten: Dårleg kvalitet på bileta kjem av manglande kamera, så eg nyttar mobilen)

Eg har fått mi fyrste TAKK-gåve!

Postkasselokket stod formeleg og hoppa då eg kom til postkassa i dag, og som den pessimisten eg er, må eg innrømme at eg frykta ho var smekk full av rekningar med forfallsdato om 4 dagar eller noko slikt. Stor vart gleda då det låg ein tjukk, brun A4-konvolutt med MITT namn handskrive på!

Og ikkje mindre vart gleda då eg opna pakka. Anette K på hobbyforum har sendt meg stoff, så no må eg setje meg ned og kikka på dei fine (og komplette!) nesten 30 år gamle årgangane med Alt om håndarbeide eg har overteke etter mamma, for mamma tok vare på alle mønsterarka som var med.

Var ikkje stoffa vakre? Og så eg som er så glad i sommerfuglar!

(Det hendte noko rart med fargane frå mobilkameraet, men eg såg det ikkje før eg såg det på dataskjermen. Det er fargen nedst som er mest “naturtru”.)

Tusen takk, Anette! Du gjorde denne dagen til ein strålande dag!

… med eit nytt prosjekt. Biletet vart ikkje så bra. Ønskjer meg ny mobil med betre kamera! Men iallfall; eg broderer i krossting. Det er nok ei stund til eg kan visa fram det ferdige resultatet, men det er ganske koseleg å halda på og “små-tjone” med!